INNOVACIÓN E INDUSTRIA PON EN MARCHA O PRIMEIRO ESTABLECEMENTO DA REDE DE COMERCIO RURAL GALEGO

18-01-2008O conselleiro de Innovación e Industria, Fernando Blanco, visitou esta mañá o primeiro establecemento adherido á Rede de Comercio Rural Galego, chamado Casa Varela de Touro. Fernando Blanco anunciou a inminente apertura doutros tres comercios das mesmas características noutras comarcas rurais, explicou que o obxectivo de Innovación e Industria é contar este mesmo ano con preto de 20 establecementos integrando a Rede de Comercio Rural Galego.
Co desenvolvemento da rede a Consellaría quere levar a calidade de vida e dotar de servizos a todas as zonas do noso rural, cumprindo así varios obxectivos: · adecuar a oferta comercial ás necesidades da poboación
· mellorar a rendibilidade da xestión dos establecementos
· crear postos de traballo e dinamizar a economía rural
· dotar de novos produtos e servizos ao comercio rural aumentando a súa calidade e comercializar produtos autóctonos e artesanais galegos.

Hai unha rede de tendas repartidas por toda Galicia e que dispoñen dun servizo de asesoramento de xestión integral.

O selo de Comercio Rural Galego garante pois a calidade e o cumprimento da normativa dos mesmos e unha garantía de confianza dos produtos ofertados.

A marca Comercio Rural Galego conleva a oferta dunha serie de produtos mínimos comúns a todos os establecementos da rede, entre os que destacan os produtos locais, ecolóxicos e de artesanía alimentaria co fin de que o comercio rural sexa o referente de produtos frescos e transformados de calidade. Tamén se comercializan denominacións de orixe galegas, produtos ecolóxicos co selo de Agricultura Ecolóxica de Galicia, produtos da marca Galicia Calidade e artesanía da comarca.

Canto aos servizos, existen uns mínimos como: os de café-bar, un punto de información turística, un punto de acceso á rede e a posibilidade do pagamento con tarxeta.

Habilitouse unha área de almacén, unha área para autoservizo, unha zona de bar e unha área para o estanco. Dispuxéronse aseos adaptados para a accesibilidade de persoas con discapacidade e, por outro lado, dotouse ao establecemento dun Terminal de Punto de Venta (TPV) e ferramentas de xestión empresarial modernas.

Casa Varela, conta con máis dun século de existencia, e coa súa reforma e integración na Rede de Comercio Rural Galego preténdese dar continuidade dun negocio que ao tempo proporciona servizos aos habitantes de Touro e das zonas achegadas.